今個星期番星期一二三，放四五六日，都幾開心
番番下工
隔離production部門既呀頭
佢叫Alistar，大家都叫佢Al
同Sean係非常熟既，成日一齊食煙
佢晌叫Sean食煙果陣忽然同我講
喂喂陣間搵你傾下計
我非常奇怪
平時同佢只係點下頭～吹一兩句水
因為佢都係一個幾搞笑既人
然後佢話，我睇左你既showreel
我心唸，下？點解你會睇到？
佢話係巴西David比佢既
我話搞錯～都無我批准～
佢話你擺得上網就預左比人睇架啦～
佢話佢全個部門既人都睇左，好鐘意，想搵我針針
食完煙佢就直頭好似光明正大咁入左我地房
問我有無興趣過檔
佢一輪咀咁講左佢部門做既野
不過佢係想我做online editor
我話，下，我係offline黎喎～
佢話唔緊要，我地做既野好簡單～全部都係avid
我話，我唔熟喎～
佢話宜家新果隻avid可以變做final cut pro咁
講左好耐，我覺得佢有少少睇唔起我地部門
佢問我，你想做乜？
講真我只係想有份安穩舒服既工就夠
我其實做過，實現左夢想，我就已經覺得無憾
黎到英國都唔一定要做番剪片。。。
我當然無咁同佢講啦
佢話我地依個部門人工高好多架，有成£40,000一年
一定好過做你宜家個位囉～
我即刻打個凸
下？咁多？我宜家都係£25,000咋啵
係有d心郁既
我話，唸下先啦～
我真係無唸過由offline變online喎
感覺好似辛苦過宜家，哈哈
三點鐘
我既直屬上司Jeremy約左我地每個team member單獨開會
佢想了解一下前一排我人工既事
我將成個故事講左佢知
佢一向都知果個recruitment guy係仆街黎
佢話佢同經理Rhuari一定一定會幫我爭取到加人工
加上我叫過左probation
佢話如果唔加我人工，我可能會走（依個只係Jeremy既策略啦～）
所以一定一定會幫我
唉，又會咁岩得咁橋會發生d咁既野
如果佢地幫我爭取到，我又走左去隔離部門
就真係好仆街囉
點解呀，點解黎到依度要做咁多決定？？
好辛苦先離開到一間好出名既公司放棄名氣
做份簡單開心又多錢既工
點知宜家又有一份更加多錢但辛苦既工？
不過人地都無話請我。。。但佢講到我肯過去就一定過到咁。。。。
唉
錢，係咪真係好重要哩？
搞到成個人都唔係好集中
anyways 放工有朋友約左我睇波
係Vikki既朋友 Eric
佢係唯一一個晌度我識得而又睇波既人
本身佢就係話租間房比我既，不過宜家有人住左咯
上次去過佢度打邊爐，都幾正既個屋企
上到去佢咁岩又係green monday所以食左個雜菜蝦子面
一面睇波一面屌
英格蘭真係屎到哩。。。。
唉
最後和左，第二名出線。。。。好過無啦
睇完就番屋企，答地鐵都係唸住公事
好煩～
今晚係一個好罕有既日子
有個叫Strawberry Moon既月亮
當然唔知係乜，不過真係又大又圓～
No comments:
Post a Comment